ElRaseef الرصيف, Cairo, Egypt

ElRaseef الرصيف

القيمة والكرامة لكُل خلق الله

الرصيف إبتدى في شهر نوفمبر 2009 بمجلة إسمها "خروجات" وكان الهدف منها هو إننا نغيّر نوعية خروجاتنا بدل ما هي قهوة بس، يبقى فيها نوع من الثقافة المُمتعة فكانت الفكرة إننا نُنشر جدول للحفلات الثقافية اللي بتتعمل في القاهرة ومعاها شوية أفكار عن البلد اللي بنحلم نعيش فيها، وكانت المجلة بتتوزع ببلاش على الناس وبيدفع قيمة طباعتها رعاة وفعلاً كان معانا موبينيل ومنصور .. إلى أن قامت الثورة في يناير 2011 وطلعت موبينيل ومنصور لعدم قُدرتهم على تحمل التكاليف بعد الخُسارة المادية اللي سببتهالهم الثورة.

على الرغم من خسارة الرعاة إلا إننا كسبنا كتير بسبب الثورة فإبتدى يبقى معانا عقول جديدة أضافت أفكار تنموية أعمق من "خروجات" فبقينا أكتر وأحسن، وإبتدت مجلة الرصيف في شهر مايو 2011 بتلات أبواب وبعدين إتطورت لـ 6 أبواب.

أبواب مجلة الرصيف:

جمهورية التحرير
هي حالة عيشناها لمدة 18 يوم في ميدان التحرير ماعيشناش زيهم قبل كده ولا بعد كده، شوفنا فيهم مصر اللي في أحلامنا: حالة من التكاتف والتحضُر والكرامة، بس مصر تحريرها مش ميدان ! التحرير ميدان في قلب كل واحد وواحدة فينا.
شبكة وصل
في شباب كتير أوي في البلد دي اتجمعّوا علشان يعملوا حاجه كويسة لينا .. فكّرنا إننا نقابلهم ونتعرّف عليهم ونُنشر حكاياتهم .. يمكن حد يعجبه اللي بيعملوه فينزل يشارك معاهم أو حتى يفكر إنه يعمل حاجه بنفسه أو على الأقل نسكِّت الناس اللي بتقول إن البلد دي محدش بيعمل فيها حاجه كويسة ..تعال شوف أهُم ماليين البلد!
حواديت
حكايات من التاريخ يمكن نتعلم منه حاجه
مهارات
فكر كده شوية .. ! هتلاقي إن أكيد في حاجه نفسك تتعلمها من زمان بس ماجتش الفرصة إنك تتعلمها .. فريق الرصيف إتعرف على ناس مُبدعين كتير في مجالات مُختلفة ومش بس كده، دول كمان مُستعدين يعلموا مهاراتهم دي لناس تانيه .. إحنا جمّعنا الناس دي ونشرنا صورهم ومجالاتهم وإزاي تقدر توصلّهم علشان تتعلم الحاجه اللي نفسك فيها !
وصف مصر
أياً كان اللّي حصل أنا مش رد فعل..لأ، أنا مستقل..البلد دي ياما اتوصفت وياما اتحكت وكُل جيل له حكاياته اللي لازم يحكيها ويعرف حكاية بلده .. ولو ما عرفش حكاية بلده يبقي هايجي اللي يحكيله أكاذيب ويستغل جهله بيها .. أو يستغل جهله ويقنعه إنه لازم يقلده عشان يبقي روش زيه وبكده يفقده هويته ويخسر كل حاجة.
البلد دي اتوصفت قبل كده سنة 1802 على إيد فرنساويين تابعين للحملة الفرنسية على مصر، ووصف المُستعمِر هدفة الدراسة لمعرفة موارد الخير في البلد المُستعمرَة، أكيد ماكانتش خدمة للمُجتمع المصري .. إحنا قررنا نعمل وصف مصر جديد؛ وصف المصريين للمصريين .. لما نعرف بعض صعب نكره أو نخوّن بعض. وأكيد حنعيش أحسن ساعتها.
خروجات
لقينا إننا بس لو ابتدينا بشوية خروجات بسيطة ممكن نغير حاجات كتير أوي في حياتنا يعني بدل ما كُل ما يبقى عندنا وقت فاضي نروح نقعد عالقهوة لحد ما زهقنا من الكرسي اللي بنقعد عليه .. ابتدينا نغير ونروح أماكن تانيه ماكناش نعرف عنها حاجه لقينا ان الموضوع ده فعلاً بيفرق معانا جداً وبيعرفنا حاجات عن نفسنا ماكناش واخدين بالنا منها !

فضلنا نطبع مجلة الرصيف من شهر مايو 2011 لحد شهر ديسمبر 2012 بتبرُع بوقت وفلوس من ناس مننا علشان الفكرة تستمر وتفيد أكبر قدر ممكن من الناس وماوقفناش طباعة إلا لما لاقينا وسائل بديلة ننشر بيها الفكرة.

بيت الرصيف :
أواخر السنة اللي فاتت 2012 عملنا مهرجانين في المعادي وشوفنا قد إيه في طاقة إيجابية عظيمة بتطلع لما الناس بتتجمع على حاجه إيجابيه .. المهرجان عبارة عن معرض للصناعات اليدوية اللي ناس زيك وزيي عاملينها ومسرح كبير للفرق الفنية المستقلة ومنطقة مبادرات لعرض شغلهم ومنطقة للأطفال علشان يتعلموا حاجه جديدة.

بيت الرصيف فتح في شهر فبراير 2013 وهو مساحة حُرة مُستقلة إتبنت بأيادي مُجتمع مؤمن بإن القيمة والكرامة حق لكُل خلق الله
بيت الرصيف مفتوح علشان تعبر عن نفسك وتلاقي سبب وجودك وتطوّر نفسك وسط ناس مؤمنين إن ربنا خلقك عشان تعيش أحسن حاجه جواك وتعمر بيها الأرض وتسعد بيها اللي حواليك .

أنشطة بيت الرصيف:

مسرح : علشان لو عندك حاجه تحب تقولها للناس أو تسمع منهم
مكتبة : علشان تتواصل مع غيرك بالقرآءة
ورش عمل : تتعلم فيها حاجه أو تعلم حد فيها حاجه
الناصبه : لو ريقك نشف وعايز تشرب حاجه تشفي روحك وتفوّق دماغك

Arts & Entertainment, Community Organization

hebacairo@hotmail.fr

Pagina facebook

فيلا 8 شارع 152 متفرع من ميدان الحُرية، المعادي, Cairo, Egypt

ElRaseef الرصيف

Lascia il tuo commento

Altro in zona

أكلني - Akelni

Zenzero Coffee & Street Food

Food Gun

Brunch Egypt

FOOD Lover's

"Trova il tuo ristorante, in un clic"